Masoro 1991 (Cliquer sur photo en bas pour aggrandir)

À peine atteint l’age de Maturité

et que ce fut notre tour pour entamer les études supérieures

La guerre éclatait déjà au Rwanda!

Qui d’entre nous savait les enjeux derrière la sale guerre ? Personne

On était tous des enfants de la deuxième République

Le problème des réfugiés Rwandais de 1959

C’était pour nous une banale histoire qu’on lisait dans les livres

Mais d’emblée les divergences de points de vue se manifestèrent

Quoi de plus normal ! On était quand même des Fils de la nation

Ces Divergences existent sûrement encore aujourd’hui

Beaucoup de Camarades sont déjà morts

Beaucoup de nous ont aussi survécu

Mais que de bons Souvenirs partagés !

Que de beaux moments vécus ensemble sous le ciel de Masoro!

On était des jeunes venus de tous les coins du pays

c’était une occasion de nous découvrir les uns les autres

Ceux qui sont morts, on ne les oubliera jamais !

Ceux qui sont encore en vie, on restera toujours des amis

Nous sommes une génération de la guerre

Mais aussi Génération de la démocratisation

T.M.

N.B: Quelqu’un aurait garde aussi une photo de promotion qui lui est chere? Partagez-la nous. Mais SVP avec un mot accompagnateur!

PADIRIMURENGERANTWARI, IYI COMMENTAIRE IRI HASI NYIBONYE MULI COMMENTS 60 ZIBANZA ZIRI KULI LE PROPHETE-UMUHANUZI. SINARINZI KO UTANGARIZA INKURU ABANTU NYUMA BAKAKWITA UMUGARAGU WABO, UMUMOTSI WABO NKUKO WISOMERA MULI IYI COMMENT IRI HASI NKUYE KULI LE PROPHETE

Onesphore Barigira dit:

Muli Canada haravugwa amakuru y\’umuntu uherutse kubaza mugenzi we bari mu kabari niba yibutse kureba ko UMUMOTSI wabo yasohoye inkuru zabo muli site ye \ »le Mediateur- Umuhuza\ ». Abunvishe abo bagabo bombi baganira baguye mu kantu kubona abo bantu berura bakavuga ko Padiri Murengerantwari uba mu budage ari umumotsi wabo kubera atangaza inkuru zabo ku bwami kuli site ye. Mwiyunvire namwe aho abo ugirira neza aribo bahindukira bakakwandagaza kumugaragaro ko uri umumotsi wabo. Urwishe ya Nka ruracyayirimo koko!!!

Site Web :
IP : 80.189.142.64

Kuri Bwana Paul Kagame, Dictateur w’u Rwanda.

Ku itariki ya 5 Ukwakira uyu mwaka, Seminari nto ya Mutagatifu Leon i Kabgayi yizihizaga yubile y’imyaka 100 imaze ishinzwe. Guhera mu 1913 kugeza uyu mwaka turimo, u Rwanda rwahinduranyije ubutegetsi kenshi, hagoragazwa byinshi kugira ngo umuryango nyarwanda wiganjemo abahutu n’abatutsi ubashe kubaho neza mu mahoro nta kuryana no kuryamirana. Seminari nto ya Kabgayi mu by’ukuri yanditse amateka yaranze igihugu cyacu, cyane cyane ko ababereye ku isonga igihugu bagiye bagerageza kugishakira ituze uko bashoboye kose bagiye baherwa uburere mu iseminari ya Kabgayi, bigaragaza ko iyi seminari koko yagiye yita ku bana ba rubanda ikabavanamo abagabo bashoboye gukorera u Rwanda.

Bwana Paul Kagame, abayobozi bakuriye repubulika y’u Rwanda mbere yawe (ab’ingenzi), bose baciye mu iseminari ya Kabgayi. Iyi Seminari yizemo Geregori Kayibanda, yigamo Juvenal Habyarimana, ndetse n’izindi ndatwa zagiye zigira uruhare rukomeye muri leta zaciye mu iseminari ya Kabgayi. Paul Kagame, birakomeye kumenya neza aho wigiye amashuri yawe, ibyo aribyo byose ikizwi ni uko utanyuze mu iseminari, reka iya Kabgayi ho ntibyari no gushoboka kuko waje gutegeka u Rwanda uvuye hanze y’igihugu ari naho warerewe wanakuriye.

Paul Kagame, kuba warerewe hanze y’igihugu, bituma utegeka abanyarwanda mu by’ukuri utazi ibibaranga n’ibyo bifuza by’ukuri,  nyamara mu ijambo wavugiye mu muhango wo kwizihiza isabukuru y’imyaka ijana Seminari ya Kabgayi imaze ishinzwe, niwowe washatse gutanga amasomo ku bize cyangwa bakuriye hafi y’iyo Seminari. Uti « amakosa yakorewe muri iyi seminari umuntu ashobora kuyigiraho ushaka kubaka u Rwanda rw’ejo hazaza! » Niko se Bwana Kagame, ko umenyereye kenshi kuvugira mu kinyiranyindo, wasobanuriye neza abanyarwanda ayo makosa uvuga yakorewe muri iyo seminari wari wagiye kwizihiza! Ese ayo makosa yaba ari uko, nk’uko Musenyeri Smaragde yabigarutseho, i Seminari yagiye yita buri gihe ku bana ba rubanda ikabavanamo abagabo bashoboye gukorera igihugu? Niba ari ayo makosa uvuga yakorewe mu iseminari ya Kabgayi, biragarara neza ko ibitekerezo byawe bihabanye cyane n’inyungu za rubanda, kuko ayo nta makosa ayarimo.

Kandi rero ni mu gihe, Paul kagame biraboneka neza ko  haba mu mvugo no mu myitwarire yawe, ko ushyira imbere cyane amavuko yo mu bikomangoma nk’aho ibyo ari kamara mu kugira uruhare ku neza y’igihugu! Mu maso yawe mbese ibyo nibyo byitwa amateka, muri make kuri wowe abanyarwanda nyabo ni abakomoka mu mfura n’ibikomangoma! Iyi mitekerereze ihabanye cyane n’amatwara ya repubulika uvuga ko uhagarariye, niyo ituma ubutegetsi bwawe butazigera na rimwe bujyana n’inyungu za rubanda. Aho niho abakubanjirije ku butegetsi byibuze bakurushije kure agaciro mu micungire y’igihugu, kuko bo bemeraga ko mu bana ba rubanda rugufi harimo benshi bafite impano zigirira igihugu akamaro ariko kenshi zipfukiranwa n’uko badahabwa uburere n’ubumenyi buhagije bya ngombwa ngo bibafashe kujya mbere. Aha kandi niho seminari nto ya Kabgayi yatsindiye igitego gikomeye mu mateka y’u Rwanda, kuko abayihagarariye bamenye kare kose kubyaza umusaruro impano nyinshi zihishe mu ntamyekana no mu baciye bugufi.

Paul Kagame, Dictateur w’u Rwanda. Ntawabura na none kugushimira ko hari igihe ugira agatima k’ubumuntu, cyane cyane iyo usumbirijwe n’ibihe bitakoroheye. Bityo icyo umuntu wese yakwifuriza, akurikije amatwara yawe, n’uko bihe bitakoroheye byakwiyongera, bityo wabona ukoze n’ibitangaza abantu batari biteze. Mbese nk’ubu uramutse ufunguye imfungwa zose zigirijweho nkana na politki ruvumwa wimitse mu gihugu, ukeka ko bitakongera amanota mu maso ya rubanda? Itegereze neza ku gikorwa cyiza wigiranye ubumuntu cyo kwiyemeza kubaka amazu y’amacumbi ya Université y’i Kabgayi kimwe no kubaka ibikoni ndetse no gutanga ibikoresho. Irebere mbese ukuntu wateye abantu akanyamuneza igihe waherezaga akaboko abapadiri b’abasaza bahindutse ibimuga kubera gukobokera rubanda. Uratekereza ko biriya bitaguhesheje inota mu banyarwanda? Icyo usabwa nta kindi ni ukurangwa n’ibikorwa nka biriya, cyane cyane kumenya igihangayikishije rubanda no kugishakira igisubizo. Ibyo bizakurinda kwiriwa utuka abazungu, kandi nta n’icyo ushoboye kubahinduraho.

Paul kagame, hari abantu benshi biyemeje kutazigera na rimwe bagucira akari urutega, ndetse bahisemo kuzajya bagutera amase aho unyuze hose cyane cyane mu ngendo zawe mu bihugu byo muri Western bigendera kuri demokarasi n’ukwishyiura ukizana. Hari ikintu kimwe gishobora kukurinda kuvumwa ni isi aho unyuze hose: Nta kindi ni ukuzitura imigozi y’akarengane icyama cyawe RPF gikomeje kubohesha rubanda. Kwicara hagati y’abagore mirongo ibyatsi washyize mu nteko yemeza amategeko yawe ukibwira ko ibyo hari icyo bihindura ku isura y’uubtegetsi bwawe, uko ni ukwibeshya cyane. Uretse no kujijisha abazungu, mu maso y’abanyarwanda biriya uba ukoze biba bigarageje cyane ahubwo ugupyinagaza bikomeye igitsinagore, kuko uba werekanye ko utinya abagabo b’ibitekerezo ugahitamo gukomesha amashyi abagore b’intege nke.

Paul Kagame, Dictateur w’u Rwanda. Hari ubwo natekereje ko igihe cyarenze cyo kwirirwa umuntu ata ijambo aribwira umutwe ufunze nk’uwawe, ariko kandi iyo ugaragaje rimwe ko ushobra kwigiramo ubumuntu, nta cyabuza kugushima, birumvikana ariko ishimo rihoraho ryaterwa n’uko wakomeza ibikorwa byiza nk’ibyo wagaragarije muri Yubile ya Seminari nto ya Kabgayi. Mu gihe nanone igikorwa cyiza wakoze waba warakigiriye ubuntu utagamije kwiyamamaza no kwikura mu ngorane za politiki urimo, aho ntawabura umunsi umwe gukura ingofero agira ati komerezaho. Ntibizabe rero nka ya mbwa idashimwa kabiri, hari byinshi byo gukorwa mu rwego rwo kurenganura rubanda rwacupijwe na FPR, gerageza rero werekane ko n’inyungu z’abaciye bugufi zishobora kwinjira muri politiki uteganya mu gihe kizaza.

Ugire amahoro.

Nkusi (sé)

***************

Amateka agaragaza ko Umwami Rudahigwa yaharaniraga guteza imbere umuco karande w’igihugu, ariko ko atifuzaga gihake! Ibitekerezo by’Abalunari bikidukurikirana ababikwirakwiza baba babikomorahe he?

Nitwa Azarias Ngendahimana. Navukiye  i Gitarama/Kabgayi muli 1942. Ibyo mvuga hasi hano ni ibyo niboneye n’amaso yanjye, si amabwire.

Mu kiganiro giherutse guhita ku rubuga  “le mediateur –umuhuza”, cyitwa ngo “Mzee Karyabwite yumva ate indepandansi…ubwigenge?” uliya Karyabwite yashimirwa kuvuga icyo atekereza ku byabaye mu gihe u Rwanda rwaharaniraga ubwigenge no guca akarengane muri rubanda. Aliko kandi ibyinshi avuga aravanga ukuli n’ibitari ukuli (demi-veirites).
Aho nemeranwa  nawe ni aho asoza ikiganiro agira ati:” indepandansi ni ukwiyumva mo ko igihugu ari icyawe”… Ni byo koko, aliko imyumvire ntabwo ariyo avuga, ntayihishura. Atangira ikiganiro avuga ko se umubyara yagabiwe gutwara mu Kinyaga (hitwaga teritwari Shangugu icyo gihe). Ni ukuvuga ko akomoka mu bwoko bw’abatutsi, ko mu gihe cy’amashyaka yagiye muri Lunari. Bityo rero uko tuzi imyumvire ya Lunari ku byerekeye igihugu, itekareza ko igihugu ali icyayo, mu gihe yihariye ubutegetsi bwose bwa politiki, u bukungu, imilimo n’uburezi.

Bitabaye ibyo, Karyabwite yadusobanurira ate ukuntu, niba koko Lunari yarashaka ubwigenge bw’abanyarwanda, yabonye u Rwanda rumaze kubona otonomi muli 1960, rusimbuje  ingoma ya cyami intwaro ya Republika muli 1961 yiganje mo abahutu, maze aho kugira ngo bafatanye n’abandi ahubwo bagahitamo iy’ubuhungiro, banga gusa gutegekwa cyangwa gutegekana n’abahutu?
Yadusobanurira ate ibitero by’inyenzi kuva muli 1960 bifashisha abaswayire bo mu Gacurabwenge bayobowe n’uwitwa Numa wayogoje za Musambira ashaka kugera i Kavumu kwa Kayibanda? Yadusobanurira ate intambara y’inkotanyi kuva 1990, zashoje zimaze kubona ko imishyikirano yo gukemura ikibazo cy’impunzi zitwazaga cyali kigiye gukemurwa, maze ahubwo zigahindura imvugo ngo bulya  ikibazo si impunzi, ahubwo ni demokarasi itarangwa mu Rwanda? Si ukubera se  ko inkotanyia zari zimaze kubona ko zitazigera zitegeka zonyine?  N’ibindi n’ibiindi byinshi…

Tugarutse ku kiganiro nyirizina, uko Karyabwite yemeza ibintu cyangwa abibona, biragoretse ibi byavuna ijosi, n’akari kera bigatera iseseme. Reka  mvuge kuli ibi bitatu gusa: 1)Umwami Rudahigwa; 2) Amashyaka ya politiki; 3) Ubwigenge.

1.Umwami Rudahigwa. 

Mutara wa 3 Rudahigwa, amateka nyayo avuga ko yimye ingoma muli 1931 asimbura se Musinga ababiligi bari bamaze gukuraho bakamucira i Kamembe, nyuma akajyanwa Moba ho mili Kongo. Icyo yazize sinakimenya, kuko ntali mpari. Gusa nshingiye ku mateka nize, ntekereza ko Musinga yazize kuba yarafatanyije n’abadage kurwanya ababiligi mu ntambara ya mbere y’isi yose (1914-18). Benshi mwumvise ingabo zitwaga indugaruga, mwumva impoma zo kuli Rubavu hariya ku Gisenyi. Ni iyo ntambara nyine. Ikindi yaba yarazize ni ukuba yari atsimbaraye ku mitegekere ya cyami yicaga igakiza uwo ishatse n’igihe ishakiye nta nkurikizi.

Rudahigwa yaje kubatizwa muli gatolika yitwa Karoli Leo Petero hamwe na nyina, umugabekazi Kankazi wafashe izina lya Radegonda, n’umwamikazi Gicanda yitwa Rozariya Bahise basezerana gikiirisitu.  Ibi byabereye i Kabgayi mu mpera ya za 1940. Nabyirutse nsanga abakirisitu barimo data na mama bumvise iyo misa bakibivuga nk’ibimaze kuba. Nyuma muli 1956, abibwiwe cyangwa abyiboneye, Rudahigwa yasanze hari akarengane k’ubuhake mu gihugu, ahita ategeka ko abatutsi bagabana inka n’abagaragu babo cyane b’abahutu, ubuhake bugashira. Icyo gihe hali mu myiteguro yo guhimbaza isabukuru y’imyaka 25 Rudahigwa yari amaze ku ngoma. 

Muli iyo minsi ya yubile yabereye i Nyanza ( Karyabwite agomba kuba abizi kuko abashefu n’abasushefu bose bari batumiwe), hatangajwe icyiswe “Imbaga y’Inyabutatu Ijyambere” ndetse hasohoka n’imidali  yanditse ayo gambo bavugaga ko ali ishyirahamwe ly’umwami.

Icy’ingenzi navuga kuli Rudahigwa,  kubera kuba naramubonye n’amaso yanjye, ndetse tukanaganira muli rusange, ni uko yari umuntu ukunda urubyiruko akaruhatira kwiga ngo rujijuke. Aho mbihera ni uko kuva muli 1957 niga mu iseminari i Kabgayi (iri ku nzira ijya Kigali}, igihe cyose Rudahigwa yabaga avuye i Kigali cyangwa yaje gusura nyina i Shyogwe, yahagararaga ku Iseminari kuturamutsa no kutuganiriza byo kuduhwiturira amajyambere.

Imurika Mpuza-mahanga lyaberye I Buruseli muli 1958, Rudahigwa yarigiye mo koko aherekejwe na nyina n’intore zitabarika. Bayitaga Exposition Universelle” ntabwo ari exposition modiale nk’uko Karyabwite abivuga.Iliya Atomium ili i Buruseli ni urwibutso rwayo. Nibyo koko kandi Rudahigwa yinyuruje protokole anyarukira mu Budage muli gari ya moshi. Hali amafoto abyerekana. Ababiligi ngo ntibabyishimiye, aliko kandi ntacyo bari kubikora ho. Nyuma agarutse mu Rwanda, umwami Rudahigwa yaje kwiyerekana i Kabgayi n’umulyango we mu birori byabereye ku kibuga cya seminari. Ingoma zaravuze, intore zirahamiriza biracika. Hali haje intore ‘zumwami  ziyobowe n’ikirangirire Butera bwa Nturo, hakaba n’izo kwa nyina i Shyogwe, maze zirema ingamba ebyili zo kurushanwa. Zimwe zaturutse ku izamu ly’ikibuga ibumoso, izindi zituruka iburyo maze zihurira hagati zikubita umugara zivuna sambwe karahava. Narabibonye, nari mpari.

Abantu bakwibaza bati kuki byabereye iKabgayi.  Muli icyo gihe, u Rwanda rwari rufite kapitali ebyili. Kigali y’ubutegetsi bw’abakoloni, na Kabgayi y’ubutegetsi bwa Kiliziya Gatolika bwasaga n’ubukomeye kurusha ubwa leta. Kubera gushwana n’ababiligi, umwami yashatse kwiyereka Musenyeri i Kabgayi bisa no gutanga raporo ko ibintu byagenze neza mu butumwa  bw’igihugu yari avuye mo. Nyuma y’aho gato umugabekazi Kankazi yaje kudusura mu iseminari no kutuganirira ku Bubiligi.Nawe yakundaga abaseminari akabafata nk’abana be, kuburyo ndetse yahoraaga atwoherereza ingumba yo kulya ku minsi mikuru. Icyababaje ni uko Rudahigwa yaje gutanga bisa n’ibitunguranye atageze kubyo yaduhatiraga gukora. Mu bamushyinguye i Mwima na Mushirarungu nari mo, kubera ko ari twe abaseminari twaririmbye misa yo kumuherekeza kuwa kabili kuli 28/7/1959. Imana imuhe iruhuko ridashira.

2.Amashyaka ya Politiki.

Navuga ko byose byatangiye muli 1956 igihe Rudahigwa ashyira ho “imbaga y’inyabutatu ijyambere” yaje guhinduka Lunari. Mu ntangiriro byali nk’ishyirahamwe ligamije gukusanyiriza abanyarwanda bose mu gatebo kamwe, byo kwerekana ko nta karengane muli rubanda, ko ahubwo abaturage bose bunze ubumwe.
Muli icyo gihe ariko mu iseminari i Kabgayi hakundaga guteranira inama-ngarukamwaka y’abahoze mu iseminari nkuru ya Nyakibanda.  Ni uko nabonye bwa mbere Gitera Yozefu n’abandi benshi. Kayibanda we nari nsanzwe muzi kubera kuvukira no kwiga i Kabgayi. Ibyavugirwaga muli ayo manama sinabimenya na busa Gusa icyo nzi ni uko aribwo hatangiye gusohoka muli Kinyamateka inyandiko za Kayibanda zitwaga “Ubutegetsi bwa Demokarasi”.

Nyuma y’imbaga y’inyabutatu ijya mbere, Gitera Yozefu yaje gushinga APROSOMA  muli za 1957 Astrida (Butare y’ubu). Nayo yali ishyirahamwe rigamije kuzamura rubanda rugufi. Lyaje kuba ishyaka nyuma ariko riganzwa na MDR Parmehutu kubera guhuzagurika.
Abahutu bajijutse hirya no hino mu gihugu, aliko cyane baturutse Gitarama na Astrida (Butare) bishyize hamwe basohora inyandiko bise “Manifeste y’abahutu”muli 1957 yasabaga umwami gusaranganya ubutegetsi, ubukungu, imilimo n’amashuli mu bana bose b’igihugu. Nibwo abiyise abagaragu bakuru b’ibwami basaraga. Havutse amashyaka ya politiki nka Lunari yiganje mo intagondwa z’abatutsi, Aprosoma y’abahutu bo muli Butare na MDR yiganje  muli Gitarama, aliko ifite amshami mu Ruhengeri (BICAMUMPAKA)  na Gisenyi (Mpakaniye) . Abatusti  babonaga ko ibintu bigomba guhinduka baremye ishyaka RADERI lya Bwanakweli. Aho Mzee Karyabwite avuga ko Aprosoma yarimo ngo n’abatutsi baciriritse ni ikinyoma cyambaye ubusa. Nta mututsi nigeze numva wigeze aba mu ishyaka ly’abahutu icyo gihe.  Ahubwo hali benshi bahisemo kuryuma ho byo kwiyorobeka ngo barebe iyo ibntu bigana.

Rudahigwa amaze gutanga muli 1959 niho ibintu byakomenye. MDR yahindutse Parmehutu, ishyaka riharanira abahutu, bigamije kureshya abahutu bose ngo baryibone mo ku bwinshi, bazabone uko batsinda andi mashayaka mu matora. Ibyo Karyabwite avuga ngo ni Museneri Perraudin wabwiye Kayibanda ngo nareme ishayka ryitwa Parmehutu, nta kuli kuri mo na busa.Ese ahubwo Karyabwite yaba azi ko inama za MDR abarwanashyaka bazikoraga nijoro ku itara lya peteroli mu ishyamba lya seminari? Niba se Perraudin yari abiri mo, kuki atabahaga icyumba muli eveshe? Ese ubundi azi uko Kabgayi isa, uko ingana, uko iteye?

Jye bariya bagabo bombi ndabazi navuga ndtse ku buryo buhagije. Kayibanda muzikuva 1953  nkiri rubyogo niga mu wa gatatu wa primeri. Twaganiriye byinshi imbona-nkubone nyuma amaze kuba Perezida, jye ndi mu cyiciro cya kabili cya seminari i Kansi. Muzi ho kuba umunyabwenge, ufite ibitekerezo, wubaha ariko wigenga. Musenyeri Perraudin muzi kuva yaba Musenyeri  wa Kabgayi muli 1955. Misa yo kumuha ubwepiskopi nali nyirimo ndi umuhereza. Niwe wankomeje muli uwo mwaka. Niwe wanyohereje kwiga mu iseminari nto n’inkuru mu Nyakibanda. Twarabanye, twarasangiye ku meza, dusabana ku buryo bwose. Ewe maze no kuva mu Nyakibanda twakomje kugenderana kugeza ejobundi asubiye iwabo mu kiruhuko cy’izabukuru.

Ibyo Mzee avuga rero ni amabwire, bya bindi abalunari bakomeje kumuvuga bamuziza ko yabaye uwambere mu kubwira  ubutegetsi bwa cyami ko igihugu kidasangiwe n’abana bacyo nta gihugu kirimo. Bati nguwo umutware w’abanzi bigihugu bashaka kwica umwami Kigeri. Mumuhigire kubura hasi no kubura hejuru. Ibi tubisanga muli lya itangazo ly’abiyise abagaragu bakuru b’i bwami lyasohotse Rudahigwa amaze gushyingurwa. Na n’ubu Musenyeri Perraudin yisangiye Rurema abalunari baracyahiga umuzimu we. Mu by’ukuri se koko, ibya Kayibanda na Perraudin Karyabwite abizi  ate ko atabihagaze ho, ndetse bishoboke ko na bariya bantu atabazi?

3.Indepandansi – Ubwigenge. 

Nibyo koko muli za 1956-57 hali umuyaga w’ubwigenge mu bihugu byari bikolonijwe n’amahanga yizo za Burayi. Cyane byali bikaze muli Ghana ya Kwame Nkrumah, muli Kongo-Brazzaville ya Padiri Filiberi Yulu, muli Aljeriya hali intambara yo kwibohoza, muli Tuniziya kwa Habib Burgiba na Misiri ya Naseri. Muli Kongo y’abaturanyi byaje nka serwakira igihe cya Lumumba. I Burundi ho nta n’inzozi zo kwigenga bigeze, no kubugera ho babikesha u Rwanda. Ibya Tanzaniya na Uganda  byo ni iby’ejo bundi.

Mzee ati Lunari yonyine niyo yasabaga ubwigenge n’aho amashyaka y’abahutu yisabiraga otonomi y’imyaka 30! Iliya myaka yo sinzi aho yayivanye. Nibyo koko, Lunari yashakaga ubwigenge bwa huti-huti igamije kuzihererana abahutu ikabasubiza ku ngoyi ya gihake abazungu bamaze gutaha.Ndifuza kumumenyesha ko muli bwa bwenge n’ubushishozi bwa Kayibanda, impirimbanyi za demokarasi zahisemo kubanza kwikiza ingoma ya cyami mbere yo gusaba ubwigenge bwabviramo gusubira ku ngoyi.  Bitabaye kwirengagiza koko, ubu mzee Karyabwite abona ubwigenge bumariye iki abenegihugu mu Rwanda rwa FPR-inkotanyi?

Mu kugera ku bwigenge rero, ijisho lya rubanda ryabanje kwikiza kalinga n’ibyayo byose, zishyira ho Repubulika n’amategeko agenga ubutegetsi bwa demokarasi. Ibyo Karyabwite avuga ngo ababiligi bayobowe na Paul Heny Spaak nibo boheje abahutu  babashyira mu ivalisi bajyana mu mulyango w’abibumbye ngo nabo basabe indepandansi, ndabona ari ugupfundikanya no gupapira. Mbere na mbere, intumwa mu nama yo gusaba ubwigenge zayobowe na Kayibanda ibera muli Hotel de Ville mu mujyi wa Anverisi mu Bubiligi. Ikindi, uliya  Spaak Karyabwite avuga, siwe wari ministiri wa za koloni, ahubwo ndumva yali uwitwa Vinyi (Vigny). Naho Spaak yari miniisitiri w’ububanyi n’amahanga, ali nayo mpamvu igihe cyo gusuzuma iby’ubwigenge bw’u Randa,Loni yamutumiye ngo aze asobanure uko abyumva. Nibutse, cyangwa mbwire abatabizi ko icyo gihe Loni yo yashakaga gufatanya u Rwanda ‘u Burundi ngo bibe igihugu kimwe cyigenga. Nibwo Spaak uriya ahagurutse atangariza Loni imibare ishekeje cyane  ati:
“PAUVRETE PLUS PAUVRETE EGALE PAUVRETE AU CARRE!” Alibyo kuvuga ngo gufatanya ibihugu bibili bikennye cyane (nk’u Rwanda n’uBurundi) ni ukubikenesha kabili. Ndibuka rwose iyo mvugo kukoicyo  turi abaseminari twajyaga tuyisubira mo no kwishongora cyane, dutangarira iyo mibare ya minisitiri muzima, n’ubwo twumvaga ko atari imibare nyamibare, ahubwo yari imvugo ya dipolomasi.  Mu gihe cyo guha u Rwanda ubwigenge, u Burundi nabwo bwaboneye ho ngo budasigara inyuma kandi ku rupapuro hali handitse RUANDA-URUNDI. Nguko uko ibihugu byacu byombi byigenze ku munsi umwe wa 01/07/1962.

Ndasanga rero ibyinshi muli ibi mzee Karyabwite avuga ari amabwire, ntabyo yahagaze ho. Kandi rero ni mu gihe. Nonese ko byose byakorewe  mu Marangara, i Nyanze n’i Butare (Astrida), Karyabwite yigeze ahakandagiza ikirenge muli icyo gihe (etre sur le theatre des operations / to be at scene of events/eye witness). Politiki yose yakiniwe iyo kure y’aho yari ari mu Kinyaga, cyangwa se ari no mu buhungiro nyuma ya 1959. Simpamya ko kuba Karyabwite yari umwana w’umutware byaba byaramuhuje na bariya bose kuva ku mwami n’umulyango we kugeza kuli ba Kayibanda na Musenyeri Perraudin. Iyo byibura aza kuba yarigaga mu ri turiya duce ho umuntu yagenekereza. Aliko kandi si mu iseminari, kuko abanyakinyaga twiganye ntarimo. Azabaze ba Shyirakera, Rwakareke, Ruberizesa, Gashugi, Ngirincuti, Gashabizi n’abandi ntarondoye bahiigaga icyo gihe. Ibi byose ndabimubwira kugira ngo yumve koko ko  ibyo mvuga nabihagaze ho.

Muti ese wowe ubwigenge ububona ute ? Ubwigenge ni ukugira igihugu kiyobowe neza n’ubutegetsi bugendera ku mahame ya demokarasi, mu mucyo (transparency)  nta buryamirane ubwo alibwo bwose mu benegihugu, haba muli politiki n’ubutabera,  mu  bukungu, mu burezi no mu buzima bwa buli munsi. Abategetsi bakitorerwa n’abenegihugu hakurikijwe ubushobozi (meritocracy). Umutegetsi witwaye nabi akabihanirwa (accountability). Hano mu Rwanda bizagerwa ho ari uko rubanda yemeye kwicarana ikinegura ibwizanya ukuli nta kubindikiranya Aliko kandi biraracyagoranye  mu gihe bamwe bagifite imyumvire nk’iya Lunari muli za 1959-60, idashaka gukura no gushyira mu gaciro(honest common sense).
Ngibyo, nguko.

A.Ngendahimana, Kabgayi.

********************************

Ibyo nenga abapadiri ba leprophète na  Twagiramungu.

Jyewe, nk’umusomyi wa leprohete uri mu Rwanda( nyisoma rwihishwa), hari ibyo mbona bikwiye abapadiri ba leprophète bakwiye kwitondera.

Turi mu bihe bikomeye bisa na Révolution , kugirango ingoma y’igitugu ihirikwe, hakenewe ibitekerezo, umusanzu wa buli munyarwanda nta kuvangura. Umupadiri, umusilikare, umututsi, umuhutu, umutwa, bose barakenewe, ntabwo ari igihe cyo guca abantu mo ibice.

Nyamara uko bigaragara, leprohète n’abayili inyuma, basa n’abashaka gushungura abanyapolitiki ba opposition, uhereye kuli RNC na FDU bifatanyije, ubwo n’abandi bazashyira babagereho, kuburyo hasigara  Twagiramungu gusa, akaba ariwe usigara yitwa ko ari umunyapolitiki  w’umuziranenge. Ngo we ntiyishe, ngo yakoze amakosa ya politiki gusa, amakosa yagize ingaruka tuzi twese. Kwica se ni ugukoresha imbunda cg umupanga gusa? Ese ubundi iyo umunyapolitiki akoze amakosa  ya politiki, ayo makosa agatuma hapfa abantu miliyoni  imwe irenga, yagombye kwibonamo umuziranenge?   Muli Demokrasi, iyo mauvaise appréciation  igize ingaruka nka ziliya, umunyapolitiki wiyubashye atira conséquences. Agatanga imihoho.

 Uku kwibasira RNC na FDU ariko ntimukeke ko kudafitiye inyungu Twagiramungu. Ubundi mu Bihugu birimo demokrasi, ushobora gushaka amajwi urata projet politique yawe, ukabwira abaturage ibyo uzabagezaho, basobanukirwa bakagutora. Iyo nta stratégie ufite, nta projet ifatika ufite, ushobora kubona amajwi utavuga ibyo uzakora, ahubwo ukritika projet y’uwo muhanganye. Nabyo biguhesha amajwi. Iyo witegereje ibyo Twagiramungu akora abinyujije ku mbuga, usanga yarahisemo inzira yo gukritika, kuvuga nabi amashyaka asa  n’aho amurusha  kuvugwa, n’umuvuduko mu kwihutisha ibintu.   We agira Imana ntacyo babona bamukritikaho kuko ntacyo yagezeho cyo kugawa dore hashize imyaka 17 „ari muli opposition!“

Ikindi gishobora kuba kihishe inyuma y’uku gusebya abanyapolitiki ba opposition batavuga rumwe na Kagame, byaba ari ukugirango RDI ya Twagiramungu ijye kuli scène poliotique, ivugwe,  ye kwibagirana, kuko ni ikintu kidasanzwe  gisomwa n’abantu benshi kubona umunyapolitiki uvuga ko arwanya Kagame na FPR atoteza opposition nawe yitwa ko arimo. Bitangaza abantu rero bigatuma basoma ibyo leprophete yandika kuli RNC/FDU ari benshi. Twagiramungu na leprophete rero si ibicucu bazi ko  izi débats zidafite akamaro ariko zihora kuli internet zituma benshi bamenya RDI, bikayiha ndetse n’uburemere idafite, bityo abayoboke itabashije kubona binyuze mu nzira honnêtes, ikababona ikoresheje uburyo bwo gushyushya imitwe.

Hari umuyoboke wa Twagiramungu wavuze ngo abantu bagomba kumenyera kugira débat démocratique, ariko débats zisenya opposition, mu gihe abantu bari batangiye gushyira hamwe, icyari cyarabuze gitangiye kuboneka, ntawe uzikeneye. Ntabwo rero abanyarwanda ari ibicucu ku bulyo wakora akazi ka Kagame ko gusenya opposition imubangamiye, ngo ubasobanurire ngo ni liberté ya expression. Ahangaha nakwibutsa aba bapadiri ko  nibagira ibyago bakashyirwaho kashi yo gukora ibili muli intérêts za Kagame na FPR, niyo baba babikora batabishaka, batabitekerejeho bihagije, bizabagora kugirango iyi kashi izabaveho.  Yesu ishimwe ariko, ibuye ryagaragaye ntiriba rikishe  isuka.

Mugihe abanyapoliki bamwe ba opposition babona ko inzira y’amahoro arambye  mu Rwanda,  inyura ku bwiyunge no kubabarirana, harimo abagitekereza ko guhana no kwihorera ari ngombwa. Aba babanze barebe ibyabaye muli Afrika y’epfo , yewe no mu Burundi duturanye, bazabona ko guhana no guhora rimwe narimwe bishobora gutambamira amahoro. Iyi Ni Real Politik. Niba leprohpete na Twagiramungu   babona ko inzira yo guhana no guhora ari yo izazana amahoro mu Rwanda, ni uburenganzira bwabo et bonne chance, gusa nibabishyire muli projet politique yabo maze abantu bose babisome,  abazabishima bazabakurikira babatore. Noneho ariko nabo bahe amahoro abahise mo inzira y’amahoro aciye mu bwiyunjye no kubabarirana,  babareke bakomeze umushinga wabo.

Icyo bariya bapadiri batazi kuli Twagiramungu ni uko ari muntu udashaka na limwe

kujya muli ombre y’undi munyapolitiki bali muli coalition imwe, ntashaka umujya hejuru, cyakora nayo ni qualité muli politiki.  Ibyo yarabikoze ku Kabusunzu asandaza MDR  biranamuhira FPR imugira Premier Ministre, noneho icyo izamuhemba ubu mukitege amaso. Mbere y’uko Sendashonga apfa bari bamaze kugirana utubazo, bapfa kuyobora FRD. Twagiramungu yaravuganga ngo nabaye Premier Ministre, yari ministre wanjye ntiyategeka FRD mpari. Ibyo nabihagaze ho ndabizi. Ntabwo yemeraga ko Sendashonga hari qualité amurusha. Ikibi cyo kuba „ c’est moi ou c’est le chaos“, nta bwo ushobokana n’abandi muli politiki.  Kuko muli politiki habamo ni ukumenya gukora compromis , ukamera ko hari abafite qualité, cg se dons ziruta izawe, ukamenya gushyira imbere inyungu z’ishyaka, za opposition, mbera y’izawe bwite. Icyo rero cyo kutemera ko hari umuntu umujya hejuru mu ishyaka, abenshi bakimuziho ariko umenya bariya bapadiri batarakimenya. Nkabona ko iyo RNC, FDU bivuzwe cyane kumurusha agira ishyari, même na Ingabire uri mu munyururu, ubona Twagiramungu adashimishijwe n’uko avugwa cyane kumurusha. Muzajye mwumva uko avuga Ingabire. Cyakora iyo  ni nature ye, Imana itanga uko ishatse.

Ikindi umuntu yagaya Twagiramungu ni uko ntabwo yevolua, ngo agendane n’igihe. Yumva ko discours yo muli 1958-61 yo gukangurira abaturage révolution yakoreshwa  no muli 2012,  kandi hari ibintu byabaye muli 1994,  bitatuma umunyapolitiki ushishoza yongera gukoresha amagambo  na méthodes byakoreshejwe muli 1958-61. Abantu bakeneye gusana imitima, kwiyunga no kwegerana, amagambo asa n’aho ahamagarira ubwoko kwishyira hamwe contre ubundi,  ni amakosa. 

Ubundi politiki si  statique, ihora ihinduka, uwo  mwigeze guhangana mu bitekerezo cg se mu Ntambara y’imbunda, ejo mushobora gukorana  iyo circonstances zibitegetse. Ni ibi rero abahutu n’abatutsi barimo gukorana muli politiki, utabyumva ni  uko nyine atumva politiki. Ibi ariko ntitwabigaya Twagiramungu gusa, kuko usanga amashyaka menshi asa n’aho ari clubs z’abantu bavuka mu karere kamwe, ubwoko bumwe,  etc…, rero usanga nta gishya kuko  nibyo tumenyereye mu mateka yacu, igishya kandi cyananiye benshi, ni uguhuza amoko yose, uturere twose mu ishyaka limwe,  ababigezeho cg se batekereza kubikora si abo kuraswa na Kagame cg se gutotwezwa  ku mbuga nka leprohete,  ahubwo ni abo gukurirwa ingofero.

Mugire amahoro.

Gatanazi,

Kigali/ Rwanda.

Ndabasuhuje cyane. Imana ibe hafi yacu. Nyuma yo gusoma inkuru yuzuye amatiku yasaga nisubiza umunyapolitike utavugarumwe na kigali,ngasoma niyo uwo munyapolitike witwa NKIKO NSENGIMANA yanditse,zose nazisomye nzohererejwe n’umuntu ubasha kugera aho ntagera(kuri za site),nababajwe cyane no kubona kugeza ubu abanyarwanda(les opposants) kugeza uyumunota bataramenya urugamba barwana kandi ikibabaje ni uko biri kugaragara kubari bakwiye kutuyobora nkatwe urubyiruko munzira itugeza murwatubyaye. Yaba NKIKO,yaba EVODE ntanumwe wabashije kugaragaza ikinyabupfura n’indangagaciro ikwiye umunyarwanda uteganya kurusha abanyapolitike batubanjirije kugera kuri KAGAME na FPR ye. Ni byiza kunenga ariko rwose EVODE nanenge ashyizemo kwihanganirana kuko nibyo bidukwiriye,nibyo koko NKIKO NAWE yitwaye nkuwafashe igihugu akaba arimo arengera ingoma or ararwanira kubohora igihugucye kugitugu cya FPR. Rwose babyeyi bavandimwe nimworoherane,muvuge rumwe,mukundane,musenyere
umugozi umwe,bityo mwicarane murebe kure,mumenye urugamba turwana urwarirwo nuwo murwana,maze natwe abana banyu mutwereke inzira ducamo tubohoze igihugu cyacu. Murakoze,Uwiteka  abane namwe.

J. Damascène

[De notre rubrique "Courrier des lecteurs"-NDLR]

**********************************************************************

IMIGANI MIGUFI

1. Uko urutare Mahurizo rwaguye rugaramye rukagarika umwogo w’inda

Icyo nkundira imigani nk’ iya Bakame, uyisangamo ibintu bidasanzwe: Bakame ukayumva iganira n’ abantu, inyoni, amabuye ndetse n’ ibiti. Uhimba bene iyo migani wagirango nta miziro agira: arica agakiza, ubuvanganzo bwe ntibugira aho buhagararira. Ntatinya kuvuga ati: “Urunyo rwagiye mu gisabo, bakiboganizamo amata rukayagotomera, rukurira mu gisabo kugeza ubwo ruhindutse umukobwa mwiza cyane ukwiye umwami wenyine”.  Henga ndeke umukambwe duturanye aducire umugani.

Umunsi umwe ijoro ryapfuye gukubita inda hasi, imvura mbi cyane itigeze ibaho itangira kugwa kugeza inkoko za mbere zibika. Yari imvura y’ amahindu avanze n’ inkubi simusiga y’ imiyaga. Mu gitondo abantu bapfununtutse mu mazu yabo bakubitwa n’ inkuba, bacika imirogo kubera amarorerwa iryo joro ryabasigiye. Kuva imiyaga yatangira kuduhira, insina zahise ziryamira hasi, ndetse n’ izikiri insore zitikoreye ibitoke nta n’ imwe yari igihagaze. Wabonaga ziryamiye urubavu rumwe, umutwe zawerekeje aho umuyaga wajyaga, naho ikibuno giheneye aho umuyaga waje uturuka.

Umuyaga wageze mu biti nabyo ubikoramo akantu, iby’ intwari muri byo byihagararaho, n’ ubu biracyahagaze byemye bishinze ijosi , naho ibindi birahengamye nkaho byanze rwose gukubita ibipfukamiro hasi ngo bisenge uwo muyaga uko wabishakaga, ariko ibiti by’ ibigwari byifashe nka ziriya nsina biriryamira birambya imizi yabyo k’ ubutaka. Iby’ imyaka mu mirima byo ntawabivuga, ni agahoma munwa: imvura yanombye imyaka, hanyuma imivu iraza irikorera. Ese mwokagira Imana mwe inyoni zo zabigenje zite? Igihe cyo mu bunyoni, ari wo mwanya wazo wo guhanika amajwi, nta nyoni n’ imwe yigeze ikopfora. Wagira ngo zamenye uruzaba, zihitamo kujya kwiyakira ubuhunzi mu mahanga. Yewe n’ inyoni z’ inkecuru zagurutse kibuno mpamaguru ngo zikwepe urupfu. N’ ibishwi ari ibishwi bizwiho kuba ibicucu sinzi aho byakuye ubwenge bwo guhunga icyo cyorezo. Tekereza nawe gutura ahantu n’ inyoni  ari inyoni zidashaka gukoza ibirenge. Ako karere kagize ibyago bikomeye k’ uburyo uduce tumwe twako abaturage baduhaye andi mazina adukwiye: hari ahitwa Hiroshima, n’ ahitwa Nagasaki, n’ ahandi bise Somaliya, ariko ahasenzekaye cyane bahise Rwanda rwa Gasabo, utibagiwe aho bise Sodoma.

Iyo bakina umupira w’ amaguru, hari ubwo usanga Rwanda icengana na Sodoma. Mu mukino nk’ uwo, Sodoma igaraguza agati Rwanda, kubera ko  abakinnyi  ba Rwanda icyo bazi ni ukwicana no kunekana gusa. Muri ako karere hari urutare nyamunini rwiberaga haruguru y’ inzira, ariko kubera iyo mvura n’ imiyaga by’ iryo joro, urwo rutare rwarashyigutse, rutera intambwe ebyiri rwirunda muri iyo nzira rurayifunga neza. Umugenzi wa mbere w’ inkwakuzi  arugeho agerageza kurusunika rumutera ubutaka, ashaka ukuntu yarubererekera mu mpande asanga bidashoboka na busa, abonye ko byose byamunaniye, yiyicarira hasi ubona yihebye rwose. Yibwira ko nagira amahirwe haribuze umuntu umurusha ibigango akaruhavana. Yahamaze amasaha n’ amasaha mbere y’ uko umugenzi wa kabiri ahasakara. Uwo mugenzi wa kabiri urutare rumubonye ruraseka rucika imbavu, yari umukecuru wububa. Nawe araza yicara hasi afite ishavu. Bombi bategereza umugenzi wa gatatu. Umugenzi wa gatatu ahahingutse nawe basanga ntacyo amaze, yari umwana ukiri mu mashuri abanza. Nawe arabasanga yicara hasi. Bose bategereza umugenzi wa kane. Umugenzi wa kane ahageze, barushaho kwiheba: yari ikimuga kigendera ku mbago. Uwo munsi urutare rwahagaritse abantu benshi, bafite agahinda ntawe uvugisha undi. Kandi reka bagire agahinda birumvikana: harimo umwana wagombaga kujya gukora ikizamini cya leta, hari uwarushishikajwe no kujya gufata indege imujyana ikantarange iyo ijuru riterwa inkingi, hari umusore wirukanswaga no kujya guhabwa isakaramentu ryo gushyingirwa. Abo bose bari bafite ibibazo birenze ibya Ndabaga tujya twumva. Wagirango ibyo bibazo byabo byarushaga uburemere urwo rutare.

Mu gihe bazi ko urugendo rw’ uwo munsi rutagishobotse babona haje agasore k’ utugara duke kambaye amataratara, gasuzuma rwa rutare nk’ umuganga usuzuma umurwayi, bakumva kivugisha mu ndimi z’ amahanga nk’ aho ibyo kavuga bitaho mu kirimi cyabo kati “L’ union fait la force..United we stand”, kababwira ko kitwa Setaruka. Setaruka yigisha abo bagenzi ko hari ibintu bibiri bigomba gukorwa kugirango urutare rubareke bigendere. Icyambere cyari ukwiga gukorera hamwe nta kagajagari na gato, arababwira ati “Akaduruvayo ni ko tugomba kubanza kurenza urugo mbere yo twadukira uru rutare, kandi kugirango akaduruvayo tukavane ku ntebe yako, ni uko buri wese atega amatwi buri wese, ni uko buri wese afasha buri wese kwiyongeramo imbaraga, ni uko buri wese yitanga atizigamye”. Icya kabiri cyari ugukusaniriza imbaraga zabo zose hamwe, nta kwitana bamwana. Ahera ko abizeza ati “Nituramuka dukurikije izo nama mbahaye, urutare turarwereka uko intama yambarwa, turubwire mu gifransa duti”degage!”. Izo nyigisho zimaze kubacengeramo, bahaguraka nk’ umuntu umwe, barusunikira munsi y’ inzira bikomereza urugendo rwabo. Aho munsi y’ inzira niho barusize rugaritse umwogo w’ inda, amajanja ari mu kirere, rwabuze abaruryamisha neza, uko rwari rumeze mbere.

Urwo rutare ni urutare rw’ igitangaza: mbere y’ ibyago by’ iryo joro, wagirango hari umuntu washyize urwo rutare mu ndege ya kajugujugu arwururutsa neza arutereka aho rwiberaga haruguru y’ inzira. Ubusanzwe nta rutare rukunda kuba rwonyine. Aho urusanze uhasanga ibindi bitare cyangwa ibindi bibuye bishinyitse. Uru rutare twakomeje kuganiraho, intara rubamo yose irimo igitaka cy’ urunombe gusa, nta musenyi, nta n’ ibuye na rimwe ryo gutera inyoni. Imiserebanya ikunda urwo rutare byasaze, irujyaho iyo ishaka kwota izuba, gukina, gukora amanama, no kwica itegeko rya gatandatu kandi yicecekeye.  Abantu benshi iyo barunyuze iruhande bararusanga bakarubaza ibibazo nk’ ibi: aha hantu wahaje ute, kuki mu bitare byose tuzi ari wowe wibana wenyine, ese ubundi  amaherezo yawe ni ayahe? Kubera ibyo bibazo byose, abasangiye na rwo ubwenegihugu barwita Mahurizo. Hari ubwo umuntu aza akarusanga akarwegera akaruhata ibyo bibazo byose hanyuma akabona rwicecekeye nta kibazo na kimwe rusubije, aho gukorwa n’ isoni ko avugisha ikibuye, akikubura akagenda yivugisha inzira yose ati “Mahurizo ni ukumurenganya: ese jyewe uwambaza amaherezo yanjye sinarya iminwa nkabura icyo musubibiza, ese uwambaza aho narindi mama ataransama namubeshya iki, ese uwambaza impamvu mbwira abantu ko mfite roho kandi nta roho n’ imwe ndakubita amaso nakwirwa he, ese uwambanza impamvu nkunda umuntu imitsi yanjye yose ikarega ariko we yankubita amaso akenda kuruka sinatangira guhebeba nk’ ihene”? Abahuye n’ uwo ugenda yivugisha kubera Mahurizo baratangira bakamutunga agatoki bamuryanira inzara, naho giti mu jisho w’ [I Kantarange]«   akamwita “umusizi n’ umukirisitu wahatari”.

Joseph Tagisi

2. Nyirahuku iburira andi matungo mu rugo ntibashe kumvwa

Ngo INJANGWE(nyirahuku cg agapusi) yabwiye Inka zo murugo aho, iti: Nagirango mumfashe DUSIBE UMWOBO NABONYE HARIYA MUNZU UTAZAVAMO KABUTINDI. Inka ziti, KABUTINDI? Ziti(INKA) GENDA UWUSIBE WENYINE NIWOWE urara muri iyo nzu na SHOBUJA twe Turara hanze. BUKEYE muri wa MWOBO havamo KABUTINDI KOKO( INZOKA YA RUTURA) maze IRUMA NYIRURUGO AHITA AHASIGA UBUZIMA.

Ubwo Icyakurikiyeho muracyumva. Yari UMUKIRE, bahise baza MUKIRIYO, zanka BAZIBAGIRA KUZIMARA, ZIRA MUKURIKIRA. NYIRAHUKU ISIGARA YONYINE.

S.: Inyenyerinews

3. Bihehe ijya i Nyanza kwiba ingoma

Umunsi umwe, Bihehe yagiye i Nyanza, isanga basinziliye. Iterura ingoma, iyigeranye ku manga ingoma iragwa, ilivugiza.

Bihehe irahunga. Ihura n’intama.

Bihehe iti: “wa mugabo we, urava he?”
Intama iti: “ndava i Nyanza.”
Bihehe iti: “hali mateka ki? “
Intama iti: “hali iteka lica urugomo.”
Bihehe iti: “wibeshya !”

Intama iti: “reka dusimbuke iliba lili haliya, nitumara gusimbuka ndakubwira andi mateka y’i Nyanza.”
Bihehe iti: “ni koko.”

Intama iranyaruka, irasimbuka. Bihehe isimbutse yikubita mu iliba.

Intama iligendera, isiga Bihehe muli ilyo liba yivurugutamo. 

Intama igeze kure gato, ihura n’agakima.
Agakima kati “ni iki ko wiruka ?”
Intama iti: “ni Bihehe.”

Agakima kageze ku iliba, kabonamo Bihehe.
Kati: “urakora iki ahongaho ?”
Bihehe iti “naguye muli ili liba, aliko uwankuramo namugororera.”
Agakima kayihereza umulizo, karayikurura ivamo.

Bihehe imaze kuvamo, yanga kurekura umulizo.
Agakima kati: “ndekura se !”
Bihehe iti: “nkurekure ungiliye neza ?”

Agakima kandi karahagoboka.
Kati: “jugunya ako gakima hejuru, nikamanuka umire.” Bihehe ikajugunya hejuru, igiye gusimbuka kugafata igwa muli lya liba.
Udukima tuligendera.

Bihehe iti: “ayi we! umushotsi wa mbere
unsanga aha aravuza induru,
maze abantu benshi baze banyice ! ”

S. Ancien Manuel scolaire, Gusoma no Kwandika 2e Année.

Bugingo a écrit:

IMIGANI

4. Inzoka n’uruyongoyongo

Kera habayeho inzoka n’uruyongoyongo maze biracudika, ndetse bigeza n’aho kunywana. Uruyongoyongo rubwira inzoka, ruti «mbere yo kunywana, ndabanza nasame undebe mu nda, nurangiza nanjye ndore mu yawe.» Inzoka iti «ese ibyo urabishakira iki nshuti twabanye?» Ruti« ndagira ngo ndebe ko hatarimo akangononwa.» Inzoka iti« ibyo na byo, ngaho nasame uroremo uko ushaka. » Uruyongoyongo ruroramo, rurashishoza rugeza mu murizo.

Inzoka iraruhindukirana irarubaza iti «ese hari ako ubonye?» Ruti «rwose ubanza karimo, mbonye hacuze umwijima!» Inzoka ni ko kurusubiza iti « nushaka ushire agahinda nta bwo ari akangononwa ubonye, ahubwo ni ukugira inda ndende!» Uruyongoyongo ruriyumvira, hashize akanya ruti «ngaho dupfe kunywana, ariko sindagushira amakenga!» Nuko biherako biranywana, bibana mudendezo, bigatumirana bigasangira amayoga.

Uruyongoyongo rwituriraga mu misozi miremire, naho inzoka ikibera mu kibaya cy’ishyamba ry’ingati. Ngo hace imyaka, ishyamba ryo kwa Nzoka bararitwika, ryose rishya ururimbi. Inzoka ihutaho ituma ku ruyongoyongo ikitaraganya iti «gira bwangu, hurura ay’Uruniga, usume ay’Ururumanza uhute ay’imbogo, ugende ay’inyaga, uze unteturure ndacikirijwe!»

Uruyongoyongo rukibyumva ntirwatindiganya, rusya rutanzitse, rwiruka amakubaruhu rutabara umunywanyi warwo. Ngo rugere ku kibaya rusanga ibyo rwabwiwe ari impamo, rubwira inzoka yizinguriza ku ijosi ryarwo bwangu ruherako rurayigurukana, rurenura mu bicu. Kera kabaye, rurananirwa, ruratentebukwa, rubwira inzoka, ruti «ngiye kugushyira hasi nduhuke nibura akanya gato,» Inzoka iti« ibyo wirota ubikinisha, dore inyuma yacu inkongi ni yose yabaye inkorashyano, ni akanya gato ngashya wese ngakongoka, ahubwo ongera umurego dukundure.»

Nuko uruyongoyongo ruriyandayanda; nyamara ay’ubusa, rugeza aho kugusha ubuconsho. Ngo rujye kwarara kugwa hasi, inzoka iti «nugwa hasi nanone nta cyo uri bube ukimariye, ihangane dore ibintu byakomeye.» Uruyongoyongo ngo rukora iyo bwabaga ariko intege ziranga zirabura, rwihonda hasi ntirwasamba.
Inzoka irarureba iti «genda shahu n’ubwo upfuye bwose ariko upfuye unyumvishije ikinyenga cyo mu kirere!» Nguko uko ka kangononwa uruyongoyongo rwavugaga mbere yo kunywana. kagaragaye.
Nyuma y’ibyo, bene Ruyongoyongo basera i Gahanga bahiga ya nzoka n’urubyaro rwayo. Iyo ni yo soko y’inzika yabyaye inzigo y’uruyongoyongo n’urubyaro rw’inzoka.

Guca ku nda n’indyalya ni ugusigira abana impyisi ugasinzira.

Sources: Umuco nyarwanda
5. Umwana wacuruzaga ahomba

Habayeho umwana wacuruzaga amacunga ku muhanda, akayatambana hirya no hino aho za tagisi zihagarara, akiriza umunsi wose muri iyo rwaserera, inzara ikamwica kubera ko yatinyaga gufata icunga rimwe mu yo yacuruzaga ngo arirye kubera kwanga kwihombya, akaza gutaha yasenzekaye, nyamara abantu babonaga inzara yamwishe amacunga ye ntibayarebe n’ irihumye. Amacunga ye akayasubirana imuhira buri munsi. Umunsi umwe, umubyeyi aramusanga amubaza impamvu ashonje cyane kandi amacunga ayareba. Umwana ashakira uwo mubyeyi ibisobanuro bihagije by’ ukuntu akeneye udufaranga, n’ ukuntu yemera agasonza aho kwihombya, nyamara amacunga akanga akamudibiraho. Noneho umubyeyi ati “Mwana rero inama nakugira ni iyi: aho kwicwa n’ inzara, ujye ufata amacunga meza uyinovore uryohewe kandi abantu bakureba, hanyuma uzirebere uko ibintu bizagenda”. Koko rero umwana yahise afata icunga rirusha ayandi ubwiza, araritonora, impumuro nziza yarwo iba yasesekaye ahantu hose, araryasamira amazi yuzuye akanwa, maze araryoherwa rwose, abamwitegereje batangira kurabya indimi bati “Twatanzwe!” Uwo munsi bwabaye ubwambere amacunga amubana make. Uwo mwana nta nzara akigira, kandi n’ icyashara kirahinda. Natwe rero,  reka dukore kuburyo abazabona urukundo n’ ibyishimo dufitiye umwami wacu bazaza kutubaza amabanga y’ aho tubikura.

Joseph Tagisi

6. Amateka y’umwidishyi

Umwidishyi yabonanye n’abanyamakuru.( umva discours nshyashya)

AMATEKA Y’UMWIDISHYI
Umwidishyi yavutse nk’abandi bana, n’ababeshya ngo bavukana imbuto … we ntaho yari guhera, kuko ababyeyi be bari rubanda ruciye bugufi.
Uwo mwana yakuranye amarere ateye ubwoba, ku buryo nyina umubyara yigeze kumureba, aramwitegerezaaa… ati akamasa kazamara inka kazivukamo ! Nawe se, bamutumaga kuragira ihene agataha zose yaziciye imirizo ! ndetse rimwe nyina yamusigiye gashiki ke, agarutse asanga yigendeye, akana yasize akaziritse…….
Amaze gukura yabaye umujura kabutindi, atangira ashimuta ihene, agera ku nka, icyo yarangirijeho yibye ingoma, umwami nyawe arahunga, umwidishyi ategekesha inkota n’inkoni, abasaza abashyira ku ngoyi, yanga kwitwa umwami ngo adasa n’abo yahiritse,ategeka ko bazajya bamwita umwidishyi.
Atwika ingoma yasanze, ikimenyetso cy’ubwami agihindura umutwe w’intare. Iby’iyo ntare nabyo bikabamo amayobera ; yari yarayisanze mu ishyamba aho yapfiriye, ayica umutwe, bawuzengurutsa igihugu cyose, ngo rubanda rurebe intare umwidishyi yishe.
 Ikindi, yanga ikamba, yambara uruhu rw’imparage, ngo niwo mwambaro w’ubwami, nako w’ubwidishyi dore ko kuvuga umwami byari bisigaye ari icyaha.
Amaze gutsemba abasaza b’inararibonye, ibyegera bye yabigize abantu bangwaga urunuka na rubanda : Nka Mbwayingoma, Buguranzira , Mpemukendamuke, Mpyisiyishyanga, n’abandi bari bashinzwe guseka urumenesha umwidishyi avuze, bakavugira rimwe bati yego Mwidishyi.
 Uko byagenze ibara umupfu rero, ibirori birakomeza kugeza ubwo uruhu rwuma rukamukanika, yatakira izo ngabo ze ati : uruhu rurankanika bidishyi ! bakavugira rimwe nk’uko yabatoje bati : Yego Mwidishyi.
Tuzagenda tubagezaho discours z’umwidishyi kuva yiyimika kugera uruhu rumukanika.

Imboni

******************************************************

Niba wifuza gucira abandi umugani urimo inyigisho, ushobora kutwoherereza inyandiko yawe.

*************************************************************

2011/11/13 damascene iyakaremye <iyadem01@yahoo.fr> a écrit:
Bavandimwe dusangiye ingorane, mukomere. Itangazo rya PDP IMANZI ryasohotse ku itariki 3/11/2011 ni ryiza,ariko riteye agahinda. Iyo muvuga ngo FPR ifite ubwoba mubishingira kubacu baborera muri gereza(Me NTAGANDA Bernard,Déo MUSHAYIDI,Victoire INGABIRE, MURWANASHYAKA Ignace, n’abandi) tutibagiwe ANDRE KAGWA RWISEREKA waciwe ijosi n’abandi baheze ishyanga, bintera umujinya mwinshi cyane. Uko muvuze hapfa beshi,bagafungwa,bakirukanwa kukazi,bagahunga,ariko duhera muribyo ntakindi dukora ngo dutabare ariko ngo KAGAME na FPR bafite ubwoba! Nimuhaguruke dushyire hamwe dutabare kuko turugarijwe. Muzirikane ko kuvugira aho twicaye tuba dutiza umurindi umwanzi kd tuzabazwa amarira y’abanyarwanda n’amaraso ameneka burimunsi. Murakoze. Nitwishyirahamwe tuzatsinda. J. Damascène IYAKAREMYE

*********************************

Igisubizo cy’Umunyamabanga mukuru wa PDP:

Muvandimwe Iyakaremye,

Mbere na mbere nagirango nkushimire ko wasomye iri tangazo kuko rikubiyemo ibyo twifuza n’ubwo natwe bitubabaza kuba tutarashobora gukorera mu Rwanda ngo dufatanye n’abandi urugamba rwa buri munsi. Kuba tudakorera ku mugaragaro mu Rwanda si ubushake buke ahubwo ni uko bitaradushobokera bitewe na Leta ikomeje kudukoma mu nkokora. Ngirango niba warakurikiranye amatangazo yacu uzi neza ko Mushayidi, président wacu mbere yo kumufata hari hemejwe ko ajya mu Rwanda hamwe na groupe bagombaga gufatanya gushinga ishyaka mu gihugu. Gusa uko byagenze ntawe utabizi. Ntabwo ariko byaduciye intege gahunda iracyahari kandi mutugaye gutinda.

Kubyereye kuba amatangazo  amashyaka atanga hanze ashobora gutuma hari abarenganywa mu gihugu kubera ubukana bw’ayo matangazo, turabizi ko bishoboka kuko natwe tuyasinya dufite imiryango mu gihugu kandi tuzi ko bayihoza ku nkeke kubera ibyo twavuze. Nk »uko rero dukunda imiryango yacu, dukunda abanyarwanda n’u Rwanda. Gusa ntibyatubuza kunega Leta n’imikorere yayo ngo itavaho igirira nabi imiryango yacu cyangwa inshuti. Mugifaransa baravuga ngo « Le silence favorise l’oppresseur ». Bishatse kuvuga ko guceceka bituma ahubwo ukandamiza abandi ariwe umererwa neza. Ako gahenge rero ntituzakamuha kabone n’iyo yaduhigisha uruhindu.

Ndangije rero nongera kwifuza ko abanyarwanda, nk’uko nawe ubyifuza, twashyira hamwe tugakora opposition forte tutitaye ku nyungu z’ishyaka iri n’iri ahubwo tukita ku nyungu z’abanyarwanda bose. Ibyo byonyine nibyo bizaduhesha intsinzi twifuza twese. PDP-IMANZI yabisabye kuva kera ariko yizera ko n’abandi bazashyira bakabyumva. Imana ikomeze irinde u Rwanda.

Jean-Damascène Munyampeta,

Secrétaire exécutif.

Barack OBAMA: « Kadhafi vient d’être tué. Désormais,tous les régimes à poigne sont voués à disparaître »!

Abiyita Ibyatwa mu kwica rubanda, ngaya amaherezo yabo ! Urabe wumva Mutimamuke wo mu rutiba !

(v.www.leprophete.fr)

********************************

Padiri Theophile muraho, nifuje gutanga igitekerezo kuri uru rubuga rwanyu, ku bijyanye n’ urupfu rwa kadafi, kimwe  n’ umwanzuro twarufataho nk’ abanyarwanda ku bitureba.
Bityo rero nk’ abanyarwanda ntitugomba kwirengagiza ibibera ahandi , kuko natwe biba bishobora kudushyikira.

Inkuru y’ urupfu rwa kadafi yamaze gukwira, kandi buri wese arabona uburyo bugayitse umuntu wiyumvaga ko ari akataraboneka yapfuyemo, umuntu akaba yavuga ko burya nta gahora gahanze!
None ndibaza nti: uwo kadafi yakoze ibiki byamuviramo ibyago nk’ ibyo ahuye na byo!?

Ntagushidikanya ko yari umuyobozi ufite imyumvire yo hejuru mubijyanye no guhindura ibintu, mu guteza imbere igihugu cye , ndetse n’ isi bishobotse. Biragaragara kandi ko mu myumvire ye atihanganiraga umuntu uwariwe wese wabona ibintu mu buryo bunyuranye n’ ubwe.
None umuntu yakwibaza, ni iki cyatumye abasha gutegeka imyaka 40 yose?

Ntawashidikanya ku bushobozi yarafite bwo kubasha kuburizamo ingufu izo arizo zose , zinyuranije na gahunda ze. bityo yashoboye kuba umuntu umwe mu gihugu, ufite gahunda abantu bose bagomba kugenderaho no gukurikiza. Biragaragara kandi ko muri ubwo buryo nta muntu n’ umwe wari wemerewe kugira icyo ahindura kuri gahunda y’ umuntu umwe abandi bose bagomba gukurikiza. birashoboka rero ko hari abantu benshi bagiye bagaragaza uko babona ibintu byagenda mu buryo bunyuranye n’ ubwe bakabizira.

None kadafi yamariye iki igihugu cye?
Nta gushidikanya ko muri iyi myaka yose, igihugu cye cyakomeje gutera imbere mu butunzi no mu bikorwa remezo, ari nako kadafi akomeza kwiyumvamo ingufu, anarushaho gupyinagaza abaturage be, yifashishije ibyo amaze kugeraho, maze abaturage nabo barushaho kumwanga urunuka, basigara bategereje igihe nyacyo cyo kumwitura ibyo yabakoreye. Nyamara aba baturage be ntibari bayobewe ko ibyo yiyitirira byose ari ibyabo: Ubutegetsi, ubutunzi, ingufu,ukwishyira ukizana. Nibwo biyemeje kubyisubiza.
Ariko ntibyari bihagije. Bagombaga kandi kumuryoza ibibi yabakoreraga, abicira ubusa n’ igihe ashakiye mu gihe baharaniraga ibyo bafitiye uburenganzira. Ntiwavuga rero ko atakoreye libiya ibyiza, ariko yirengagije abo biturukaho ari nabo bibereyeho  ashaka kwiyitirira byose nk’ aho ari imana. urupfu rwe rero rukwiye kubera isomo abishyira hejuru bose, bakamenya ikibategereje.Bage bamenya ko ibyo bagirira abandi nabo byabageraho. Bage bibuka ko ingufu bakoresha bakandamiza abandi atari izabo kandi ko hari igihe ba nyirazo bazazisubiza , bakazihereza abashoboye kuzikoresha neza.

Narangiza mbwiye aba hano iwacu mu rwanda ngo ruriye abandi rutakwibagiwe.

Mukomere kandi muge mukomeza mutugezeho ibitekerezo byanyu byiza kandi  byubaka.
Inkuru mwatugejejeho mu minsi yashize , kandi mwakoreshaga ku buryo bw’ ibigereranyo ku bibera murwanda , zirashimishije, kandi uburyo muzikoresha mutangamo ibigereranyo burumvikana. Muge muzigaruraho. Navuga nka saruhara rwa nkomokomo imaze gupyinagara ikinwa bitewe n’ impiri ya ngarama. kandi akaba asigaje kuyirasa umwambi ikirunda hasi , ingabo yayo zigakwira imishwaro. kimwe n’ izindi, nk’ umugani w’ abidishyi, indyoheshabirayi, na rwamuturagarakubijumba… mbifurije kugira amahoro y’ imana. Dusabirane

P. Kwizera, Kigali.