Ubucuruzi bwa Nshokeyinka II (Imivugo inyuranye)

 

Ubucuruzi bwa Nshokeyinka ( II )

Inkerarugendo ya rugina,
Ndi umugenza w’ igihame,
Nabyirutse nihakana igihombo !
Mu gihugu cy’ abambaye imbindo
Nabimbuye gusorera inzira !

Mu nzandiko z’ ibitegetswe
Nakurikije regerema !
Mu rupango kwa Mariti
Nungutse ibihumbi bitatu,
Ab’ ingurube bazikurura mu migozi !

Mu isoko ry’ i Gitarama
Natumburukanye ipatanti,
Abatagira icyete
Icyambu cyo guhita cyabagumiye !
Mu mategeko y’Abakuru

Nakurikije uko Leta ishaka !
Mbona mporana umuruho
Ntibyambujije amanota,
Nashoboye kuba uwa kabiri
Mu kizame kwa Muganga;

Ab’ amakenga bacyohereza intumwa
Sinatinya nigirayo !

Posted by BANGAMBIKI at 9:29 AM

 

Source: www.umuco-nyarwanda.blogspot.com